KALIBO,Aklan– Nagapabilin nga bastante ro karne it baboy nga ginasupply sa isla it Boracay.
Raya hay matapos nga kaeabanan sa meat products nga ginasupply idto hay maghalin sa ibang probinsya, imported ag locally made.
Suno kay Dra. Mabel Siñel it Office of the Provincial Veterinarian ukon OPVET Aklan nga una eon sa red zone ro munisipalidad it Malay ag mismong ro probinsya it Aklan rason nga pwede eon nga makasueod ro karne it baboy ag maging ro mga frozen ag processed food products sa Boracay maghalin sa mga red zone municipalities.
Apang, nagakinahang-ean gihapon raya it transport permit, meat inspection certification ag animal inspection certificate.
Nasayuran nga sa 17 ka banwa sa Aklan hay napueo ka mga munisipalidad ro apektado it ASF Virus nga ginakaeakipan it Balete; Batan; Ibajay; Lezo; Kalibo; Malay; Makato; New Washington; Numancia ag Tangalan.
Bangud kara, nagapadayon ro mga tikang it gobyerno probinsyal sa pakikipagbuligan sa Department of Agriculture ag Municipal Agriculture kapareho it Mass Testing, Surveillance, Culling, ag Disinfection sa mga lugar ag kagamitan agod nga matapna ro pagkalhit it virus.
