Sangka maisot nga banwa sa Japan ro ginadayo it mga turista bangud sa sangka vending machine nga karne it oso ro ginabaligya.
Sambilog sa nagabahoe nga problema it mga rural areas makaron sa Japan kapareho it Semboku sa Akita prefecture hay ro pag-atake it mga Asian black bear sa mga tawo.
Bangud nga may kakueangan sa pagkaon sa kabukiran, nagapanaog ro mga oso sa banwa agud nga mag-usoy it makaon.
Suno sa data it Japan Bear and Forest Society, 75 nga katawo ko 2022 ro nakaexperiensiya sa Japan it pag-atake it oso ag daywa sa mga raya ro namatay.
Agud nga malikawan ro mga makarondaya nga insidente, nagabutang it patibong sa ubos it bukid ro mga hunter sa Akita prefecture.
Ro mga madakpan nga oso hay ginakatay sa slaughterhouse ag ro anang karne hay ginabaligya gamit ro sangka vending machine.
Ro nasambit nga vending machine hay ginpatindog ko November 2022 ag makita raya maeapit sa JR Tazawaki station, sangka train station kun sa siin sambilog sa nagapundo nga tren hay ro Akita Shinkansen bullet train.
Kaeabanan nga nagabakae it karne it oso hay mga turista nga sakay it bullet train.
Ro mga Asian black bears hay ginokonsidera bilang vulnerable species apang indi pa raya makabig nga endangered animal rason nga pwede pa sanda nga kaunon sa Japan.
Suno sa mga nakasamit it karne it oso, malimpyo ro lasa kara ag owa it maeangsang hugum.
Mahumok ro anang karne maskin nga mabuhay nga naka butang sa freezer.
Nagabalor ro karne it oso sa 2,200 yen ukon katumbas it P1,000 pesos sa kada 250 grams.
