Nagtuga it kahadlok ag kakeoba sa sangka tricycle driver matapos nga sumunggab sa anang ginamanehong behikulo ro nagasunod kan nga motorsiklo sa Brgy. Tabayon, Banga.
Suno sa driver nga si Gregorio Ramos, magaliko kunta imaw agud nga magpagasolina apang nakibot kat gulpi eamang nga may eomagapok sa anang likod kadungan kara ro pagsadsad nana paadto sa poste it kuryente.
Ginpahayag nga posibleng masaka kunta ro motorcycle driver sa fast lane apang madaeom ro gutter rason nga naaeang-eangan raya ag sumunggab sa tricycle.
Nagkaeayo suno kay Ramos ro wire nga nakaangot sa poste rason nga dali-dali nana nga gin-atras ro anang tricycle sa kahadlok nga base makuryente imaw.
May kaangtanan kara, ginpaabot nana sa natungdan nga kunta taw-an it igtaeopangod ro mabuhay eon nga ginareklamo nga karsada bangud sa uwa it kaayusan nga pag-obra it contractor.
Ko nagtaliwan nga dominggo suno kana hay may naaksidente man sa nasambit nga lugar kon siin ro biktima hay sangka onga.
Dapat suno kana nga tawgon it barangay council ro igataeopangod it natungdan nga ahensya it gobyerno agud nga maayos ro karsada para uwa eon it madisgrasya pa
