KALIBO,Aklan– Gin-umpisahan eon ro pagsamad sa karsadahon sa parte it Oyo Torong St. Kalibo agud nga mataw-an it daean ro pag-ayos nga maka-ilig it husto ro tubi nga nagatuga it pagbaha sa lugar nga mabuhay eon nga kalbaryo it mga pumueuyu ag motorista nga paagto sa western terminal.
Mag-eowas sa mga pasahero paagto sa nasambit nga terminal hay apektado man sa pagbara it tubi ro mga residente nga nagapauli sa barangay Bakhaw Sur ag Norte.
Suno kay Punong Barangay Neil Candelario it Poblacion Kalibo nga sa tiempo ni dating Mayor Emerson Lachica hay ginsemento ro lugar ag ginbutangan it drainage system apang nakaangkon gihapon it problema sa waterways bangud nga nagabalik ro tubi ag nagabara tuga it masyadong manaba ro lugar.
Gusto sigon ni Mayor Juris Sucro nga mabutangan raya it panibag-ong drainage system nga magasugpon sa ginpa-obrang drainage system maeapit sa Purok 13 agud nga ro tubi-baha hay maka-eapos sa Aklan river.
Nagaeaum si Kapitan Candelario nga makataeana pa kara it nagakaigo nga pondo ro gobyerno.
Ro pondo hay naghalin sa LGU-Kalibo.
Bangud nga provincial road, ro proyekto hay ginapangunahan it municipal engineering office.
Samtang, natukiban man sigon nga pilang residente sa lugar hay owa it septic tank rason nga ro andang waste water hay nagaderetso sa karsada.
