KALIBO, Aklan—Humampak sa kabilugang 150 ro mga nagpositibo sa covid-19 kahapon nga adlaw sa bilog nga probinsya it Aklan.
Base sa ginpaguwang datos it Aklan Provincial Epidemiology Surveillance Unit it Provincial Health Office, tig ap-at ro maghalin sa banwa it Balete ag Ibajay; 30 sa Banga; siyam sa Batan; 31 sa Kalibo; daywa sa Madalag; napueo sa Makato; 25 sa Malay; sambilog sa Malinao; waeo sa Nabas; an-om sa New Washington ag 20 ro maghalin sa munisipalidad it Numancia.
Bangud kara, lomobo pa sa kabilugang 13,551 ro mga nailistang kaso sa probinsya kon siin 12, 474 ro mga nakarekober ag 326 ro mga binawian it hueam nga kinabuhi.
Apang, may 751 pa makaron nga aktibong kaso nga ginamonitor it ahensya nga ginakaeakipan it 593 nga presenteng una sa quarantine facility, 99 ro naka-home quarantine ag 59 ro admitted sa gintaeana nga covid-19 hospital.
Nasayuran nga ro bilog nga probinsya it Aklan hay ginpaidaeom sa Alert Level 3 agud nga malimitahan ro hueag it mga pumueoyo kasunod it pagkalhit it omicron variant it covid-19.//
