KALIBO, Aklan—Humampak pa sa kabilugang 2,155 ro nailistang kaso it Coronavirus Disease 2019 ukon COVID-19 sa probinsya it Aklan umpisa nga magtuhaw ro pandemya.
Base sa datus nga ginpagguwa it Aklan Provincial Epidemiology Surveillance Unit it Provincial Health Office, raya hay bangud sa 35 nga panibag-ong nagpositibo sa deadly virus.
Sa nasambit nga numero, 14 ro maghalin sa banwa it Banga, siyam sa Kalibo, ap-at sa Numancia, tig tatlong kaso sa Makato ag Nabas samtang tig sambilog sa banwa it Malay ag New Washington.
Sa pihak kara, may lima man nga nagdugang sa listahan it mga nagmayad rason nga sumaka eon sa 1,766 ro total recoveries.
Samtang, daywa man ro nagdugang sa numero it mga namatay rason nga bumunae eon sa 46 ro total death matapos nga dapuan it COVID-19 infection.
Sa makaron, 343 pa ro nabilin nga aktibong kaso nga ginakaeakipan it 252 nga naka-facility quarantined, 31 nga admitted sa Aklan Provincial Hospital ag 60 nga naka-home quarantined.
