KALIBO, Aklan—Nakalista ro Aklan Provincial Health Office it 27 porsyento nga positivity rate halin sa 158 nga swab samples nga ginpatigayun ko nagtaliwan nga adlaw kung siin 43 kara ro bag-ong nagpositibo sa Coronavirus Disease 2019 ukon COVID-19 ag 115 ro nagnegatibo.
Bangud kara, sumaka eon kabilugan nga 12,048 ro kaso it deadly virus sa probinsya umpisa nga magtuhaw ro pandemya.
Sa nasambit nga numero, 11,309 eon ro mga nagmayad matapos ro pagbueong ag quarantine procedure.
Samtang, nadugangan man it tatlo ro bag-ong namatay rason nga humampak eon sa 306 ro total deaths matapos dapuan it COVID-19 infection.
Sa makaron, 433 pa ro nabilin nga aktibong kaso nga ginakaeakipan it 271 nga naka-facility quarantine, 114 nga naka-home quarantine ag 48 nga admitted sa COVID ward it Aklan Provincial Hospita.
Sa pihak kara, padayun man ro pag-enganyo it health authorities sa publiko nga magsunod sa ginapatuman nga minimum health protocols ag magpabakuna para makaangkon it proteksyon ag makalikaw sa virus.
