KALIBO, Aklan—Kapin sa 16 ro nagdugang sa listahan it kaso it covid-19 sa probinsya it Aklan.
Base sa ginpaguwang datos it Aklan Provincial Epidemiology Surveillance Unit it Provincial Health Office, raya hay ginakaeakipan it 11 maghalin sa banwa it Ibajay; 3 sa Malay ag tig-sambilog maghalin sa banwa it Banga ag Kalibo.
Bangud kara, humampak pa sa 1,436 ro kabilugang kaso it deadly virus sa Aklan.
Sa pihak kara, may 17 man nga nagmayad matapos nga ginpaidaeom sa pagbueong ag isolation procedure.
Raya hay ginakaeakipan it pito maghalin sa banwa it Kalibo; lima sa New Washington; ag tig-sambilog maghalin sa banwa it Makato, Ibajay, Batan, Malay ag Altavas.
Angot kara, nagsaka pa sa 1,256 ro kabilugang numero it mga naka-rekober matapos nga tamaan it nasambit nga deadly virus.
Sa makaron, may 144 pang aktibong kaso it sakit sa bilog nga probinsya kon sa siin ginakaeakipan raya it 126 nga una sa facility quarantined, 12 ro admitted ag an-om ro naka-home quarantined.
Samtang, nadugangan it sambilog ro kaso it mga namatay bangud sa pandemya rason nga nakalista ro ahensya it 36 eon nga total deadths.
