KALIBO, Aklan—Mas eabi pang lomobo sa kabilugang 6,425 ro kaso it covid-19 sa bilog nga probinsya it Aklan.
Raya hay matapos nga nakalista eon man it 144 nga panibag-ong nagpositibo sa deadly virus.
Sa datos nga ginpaguwa it Aklan Provincial Epidemiology Surveillance Unit it Provincial Health Office raya hay ginakaeakipan it tig-sambilog maghalin sa banwa it Balete, Batan, Buruanga, Libacao, Makato ag Malinao; pito sa Ibajay; 70 sa Kalibo; tatlo sa Lezo; daywa sa Malay; 21 sa Nabas; 20 sa New Washington; oonse sa Numancia ag ap-at sa Tangalan.
Sa pihak kara, nagsaka man sa kabilugang 5,071 ro mga nagmayad kasunod it 100 nga panibag-ong total recoveries.
Sa makaron hay kapin pa sa 1, 216 ro aktibong kaso it makataeapon nga sakit sa bilog nga probinsya nga ginakaeakipan it 1,007 nga una sa facility quarantine, 108 nga naka-home quarantine ag 101 ro admitted sa gintaeana nga covid-19 hospital.
Samtang, nadugangan man it daywa ro namatay rason nga nagsaka man sa kabilugang 138 ro mga binawian it hueam nga kinabuhi sa Aklan bangud sa nasambit nga masakit.
