KALIBO, Aklan—Mas pang naglobo ro kaso it coronavirus disease ukon covid-19 sa bilog nga probinsya it Aklan.
Raya hay matapos nga kapin sa 92 eon man ro nailistang kaso it Aklan Provincial Epidemiology Surveillance Unit it Provincial Health Office sa sueod it sang adlaw.
Raya hay ginakaeakipan it 34 maghalin sa New Washington; 14 sa Ibajay; 12 sa Kalibo; tig-pito sa Makato ag Numancia; an-om sa Malay; ap-at sa Batan; tatlo sa Tangalan; daywa sa Nabas ag tig-sambilog maghalin sa banwa it Balete, Banga ag Buruanga.
Angot kara, nagsaka eon sa kabilugang 3,735 ro kaso it deadly virus sa bilog nga probinsya.
Sa pihak kara, nakalista man ro ahensya it 85 nga nagmayad rason nga nagsaka eon man sa kabilugang 2,795 ro total recoveries.
Sa makaron hay kapin sa 854 pa ro aktibong kaso it sakit sa Aklan nga ginakaeakian it 719 nga presenteng una sa facility quarantine; 70 nga naka-home quarantine ag 65 ro admitted.
Samtang, nadugangan man it sambilog ro binawian it hueam nga kinabuhi rason nga kapin sa 86 eon ro kabilugang numero it mga namatay bangud sa nasambit nga pandemya.
