KALIBO, Aklan—Uman nga nadugangan it mataas nga numero ro kaso it coronavirus disease ukon Covid-19 sa bilog nga probinsya it Aklan.
Raya hay matapos nga kapin sa 63 ro kumpirmadong kaso it deadly virus ro nailista sa bilog nga sang adlaw base man sa ginpaguwang datos it Aklan Provincial Epidemiology Surveillance Unit it Provincial Health Office.
Sa nasambit nga numero, ap-at ro halin sa Batan; lima sa Buruanga; tatlo sa Ibajay; 13 ro sa Kalibo; tig-sambilog sa banwa it Libacao, Malinao ag Tangalan; 17 ro sa Malay; tig-daywa sa Makato ag Numancia kamana man tig-pito sa Nabas ag New Washington.
Bangud kara, humampak pa sa kabilugang 2,709 ro kaso it covid-19 sa probinsya.
Samtang, nadugangan man it 34 ro mga nagmayad halin sa nasambit nga masakit nga ginakaeakipan it tatlo maghalin sa banwa it Balete; 11 sa Banga; napueo sa Kalibo; siyam sa Nabas; ag sambilog maghalin sa banwa it Lezo.
Angot kara, nagaabot eon sa 2,178 ro mga nakarecover matapos nga nagpaidaeom sa pagbueong ag quarantine protocol.
Sa makaron hay may 467 pang aktibong kaso it deadly virus sa Aklan nga ginakaeakipan it 408 nga presenteng una sa facility quarantined; 7 ro naka-home quarantined ag 52 ro admitted sa baeay-paboengan.
Samtang, nagapabilin sa 64 ro mga binawian it hueam nga kinabuhi halin kat nag-eopok ro pandemya ko Disyembre 2019.
Sa pihak nga parte, padayon nga nagaapela ag nagapadumdom ro gobyerno ag health authorities sa publiko nga magsunod sa ginapatuman nga health and safety protocols kaparehas sa tamang pagsuksok it face mask ag face shield; pag-obserba it physical distancing eabi eon sa mga matawong lugar ag pagsanitize ukon paghugas it alima sa tanan nga oras agud nga malikawan nga matapnan it virus.
