KALIBO, Aklan—Nakalista it pitong ka mga indibidwal nga nagpositibo sa Covid-19 ro probinsya it Aklan.
Base sa datos nga ginpaguwa it Aklan Provincial Epidemiology Surveillance Unit it Provincial Health Office, raya hay ginakaeakipan it tatlo nga taga banwa it New Washington, daywa ro taga-Kalibo ag tig-sambilog halin sa banwa it Malay ag Malinao.
Apang, ro taga banwa it Malay nga sangka 80 anyos nga babaye hay binawian it hueam nga kinabuhi.
Bangud kara, nadugangan it sambilog ro total deaths it coronavirus disease sa Aklan nga may kabilugan eon makaron nga 17.
Samtang, nadugangan man it 11 ro mga nakarecover halin sa nasambit nga sakit nga taga-banwa it Kalibo tanan rason nga nagaabot eon makaron ro total recoveries it 417.
Sa makaron, ro Aklan hay nakalista eon it kabilugang 498 nga kaso it deadly virus.
Sa nasambit nga numero, 63 ro aktibong kaso nga ginakaeakipan it 58 nga presenteng una sa quarantine facility ag lima ro naka-admit sa covid ward it Aklan provincial hospital.
