KALIBO, Aklan—Padayon nga naganaba ro mga nailistang kaso it covid-19 sa bilog nga probinsya it Aklan.
Raya hay sandig sa datos nga ginapaguwa it Aklan Provincial Epidemiology Surveillance Unit it Provincial Health Office kada adlaw.
Sa pinakaulihing bulletin nga ginpaguwa it ahensya, 11 eamang ro nagpositibo sa deadly virus ukon 20 porsyento ro positivity rate halin sa kabilugang 60 ka mga swab samples nga gintest sa laboratoryo sa Aklan provincial hospital.
Angot kara, ro nasambit nga numero hay naghalin sa banwa it Batan, Banga, Buruanga ag Malinao nga may tig-sambilog nga nailistang kaso; tatlo sa Ibajay ag tig-daywa maghalin sa munisipalidad it Kalibo ag Numancia.
Nagaabot eon sa kabilugang 11,712 ro nailistang kaso it nasambit nga sakit sa Aklan.
Apang sa pihak kara, nakalista man ro ahensya it 82 nga mga panibag-ong nagmayad matapos nga nagpaidaeom sa pagbueong ag quarantine procedure rason nga humampak eon man sa kabilugang 10,840 ro total recoveries sa bilog nga probinsya.
Sa makaron hay padayon pang ginamonitor it mga health workers ro 576 nga aktibong kaso it covid-19 sa Aklan nga ginakeakipan it 341 nga una sa facility quarantine, 175 nga naka-home quarantine ag 60 ro admitted.
Samtang, kapin eon man sa 296 ro mga binawian it hueam nga kinabuhi matapos nga nadugangan it daywa kahapon nga adlaw.
