KALIBO, Aklan—Padayon nga nagatinaas ro kaso it covid-19 sa bilog nga probinsya it Aklan.
Raya hay matapos nga nakalista eon man ro Aklan Provincial Epidemiology Surveillance Unit it Provincial Health Office it 161 nga panibag-ong tinamaan it deadly virus sa sueod it sang adlaw.
Raya hay ginakaeakipan it tatlo maghalin sa banwa it Altavas; 27 sa Banga; sambilog sa Batan; 28 sa Ibajay; napueo sa Kalibo; waeo sa Lezo; onse sa Madalag; lima sa Makato; 13 sa Malay; 16 sa Malinao; 18 sa Nabas; ap-at sa New Washington ag 17 maghalin sa banwa it Numancia.
Bangud kara, nagsaka pa sa kabilugang 6,736 ro kaso it makataeapon nga sakit sa bilog nga probinsya.
Sa pihak kara, nakalista man ro ahensya it mga nagmayad sa nasambit nga masakit nga nagaabot sa 148 rason nga humampak eon man sa 5,315 ro total recoveries maghalin sa deadly virus sa Aklan.
Sa makaron hay 1,281 pa ro mga aktibong kaso it infection nga ginakaeakipan it 1,067 nga una sa facility quarantine; 108 nga naka-home quarantine ag 106 ro admitted sa gintaeana nga covid-19 hospital.
Samtang, kapin eon man sa 140 ro kabilugang numero it mga binawian it hueam nga kinabuhi bangud sa nasambit nga deadly virus.
