KALIBO, Aklan—Owa it bag-ong nailista nga kaso it COVID-19 ro Aklan Provincial Epidemiological and Surveillance Unit halin sa 40 ka mga swab samples nga gin-test ko Oktobre 30.
Bangud kara, nagapabilin sa 12,632 ro kabilugan nga tinamaan it virus sa probinsya umpisa nga magtuhaw ro pandemya.
Sa nasambit nga numero, 12,293 eon ro mga nagmayad matapos madugangan it waeong bag-ong recoveries kahapon.
Sa pihak kara, nakalista man ro taeatapan it sambilog nga namatay rason nga sumaka eon sa 321 ro kabilugan nga namatay matapos dapuan it deadly virus.
Sa makaron, 18 eon lang ro nabilin nga aktibong kaso it sakit nga ginakaeakipan it 14 nga naka-facility quarantine, daywang naka-home quarantine ag daywang admitted sa ospital.
Ro nasambit nga datus hay nagapakita eamang it padayun nga pagnaba it kaso it infection apang kinahang-ean gihapon nga ipairal it tanan ro pagsunod sa minimum health protocols para daeayon nga matapna ro pagkalhit it virus.
