KALIBO, Aklan—Padayun ro pagnaba ro nailistang kaso it COVID-19 sa bilog nga probinsya it Aklan sa nagtaliwan nga mga dominggo.
Base sa datus it Aklan Provincial Epidemiology Surveillance Unit, naga-abot eamang sa 13 ro nailistang bag-ong kaso umpisa Pebrero 27 hasta Marso 5.
Suno kay Dr. Cornelio Cuachon Jr. it Provincial Health Office (PHO)-Aklan nga buot hambaeon kara hay naga-average eamang ro probinsya it sambilog hasta daywang kaso kada adlaw.
Sa pihak kara, padayun man ro panawagan it ahensya sa publiko nga padayun gihapon nga sundon ro minimum health protocols bangud owa pa natapos ro away sa pandemya.
Indi sigon dapat maging kampante ag sa baylo hay gamiton ro gina-angkon nga sangkiri nga kahilwayan para magdahan ag magpangita agud nga uman nga makabangon.
Ginpahayag pa ni Dr. Cuachon nga importante gihapon ro pagpabakuna kontra COVID-19 para makaangkon it dugang nga proteksyon.
Nasayuran nga naga-abot eon sa 74.91 percent ro fully vaccinated sa Aklan halin sa kabilugan nga populasyon.
Matueopangdan nga sambilog ro probinsya sa pilang lugar sa nasyon nga ginpaidaeom sa Alert Level 1 ukon New Normal umpisa Marso 1 hasta 15.
