KALIBO, Aklan—Sumaka pa sa 7,185 ro kabilugan nga numero it mga tinamaan it Coronavirus Disease 2019 ukon COVID-19 sa probinsya it Aklan umpisa nga magtuhaw ro pandemya.
Base sa datus nga ginpagguwa it Provincial Health Office (PHO)-Aklan, nakalista sanda it kapin sa 141 nga mga bag-ong nagpositibo.
Sa nasambit nga numero, 21 nga kaso ro maghalin sa Kalibo, 20 sa Ibajay, tig-16 sa Nabas ag Tangalan, 12 sa Numancia, tig-11 sa Banga ag Malay, siyam sa Makato, tig-waeo sa Balete ag Libacao, lima sa Malinao, daywa sa Altavas samtang tig sambilog sa banwa it Buruanga ag New Washington.
Sa pihak kara, 114 man ro nadugang sa numero it mga nagmayad rason nga nag-abot eon sa 5,663 ro total recoveries.
Samtang, an-om man ro nadugang sa listahan it mga namatay rason nga humampak eon sa 153 ro death toll it probinsya pag-abot sa COVID-19.
Sa makaron, 1,369 pa ro nabilin nga aktibong kaso nga ginakaeakipan it 1,050 naka-facility quarantine, 214 nga naka-home quarantine ag 105 nga admitted sa COVID ward it Aklan Provincial Hospital.
