KALIBO, Aklan–Nakalista ro Australia it 10,186 nga bag-ong kaso it COVID-19 sa sueod eamang it sang adlaw.
Suno kay Bombo International Correspondent Denmark Suede it Sydney, Australia nga raya ro pinakamataas nga kasong nailista it nasyon umpisa nga magtuhaw ro pandemya.
Mag-eowas kara, nag-anunsyo man ro estado it New South Whales it kauna-unahang pasyenteng namatay bangud sa Omicron variant.
Ro natungdan nga pasyente hay fully vaccinated ag naga-edad it masobra 80 anyos kamana man nga may dati eon nga baeatian.
Una nga nakasueod ro Omicron sa Australia ko ulihing dominggo it Nobyembre kung siin nailista ro local transmission kara sa unang dominggo it Disyembre.
Suno kay Suede, mabahoe nga bulig ro pagpabakuna agud malikawan ro pagkamatay it pasyenteng tinamaan it COVID-19.
Sa makaron, naga-abot eon sa haeos 91 porsyento it populasyon ro bakunado rason nga sangkiri eamang ro andang nailistang fatalities.
