KALIBO, Aklan—Haeos kontolado eon it lokal nga gobyerno it Ibajay ro sitwasyon it Coronavirus Disease 2019 ukon COVID-19 sa andang banwa.
Ginkalipay ni Legeaue of the Municipalities of the Philippines (LMP)-Aklan chapter president ag Ibajay mayor Joen Miraflores nga naging epektibo ro andang ginpatuman nga surgical lockdown sa porsyon it Sitio Pang-pang sa Brgy. Laguinbanwa kamana man sa Purok 2 ag 3 it Brgy. Ondoy.
Raya hay matapos nga makontrol ro pagkalhit it COVID-19 infection sa lugar kamana man nga ginbawi eon ro surgical lockdown.
Ro porsyon it Ilawod sa Brgy. Poblacion eon lang sigon ro nabilin nga naka-surgical lockdown apang nakataeana eon man raya nga magtapos sa maabot nga Mayo 4. Sa makaron hay 23 pa ro nabilin nga aktibong kaso it Ibajay nga puro naka-facility quarantined.
Sa pihak nga parte, syento porsyento eon nga haum ro LGU-Ibajay para sa pag-umpisa it vaccination rollout sa andang banwa.
Nagaeaum man si Mayor Miraflores nga maumpisahan eon sa masunod nga dominggo ro pagbakuna sa andang A1 beneficiaries.
Sa makaron hay nagahueat eon lang sanda it abiso halin sa Provincial Health Office.
