KALIBO, Aklan—Ginkalipay ni Mayor Emerson Lachica ro amat-amat nga pagnaba it kaso it COVID-19 sa banwa it Kalibo.
Suno kana nga owa naging madali ro andang pagsukoe sa COVID 19 eabi pa ag ro Kalibo hay ro ginakabig nga epicenter it nasambit nga makamaeatay nga sakit.
Base sa datos it Provincial Epidemiology and Surveillance Unit it Aklan Provincial Hospital, ro Kalibo hay may kabilugan eon nga 1,188 nga kaso umpisa nga magtuhaw ro pandemya.
Sa nasambit nga numero, 953 ro nagmayad samtang 193 ro actives cases.
172 ro naka-facility quarantine ag 21 ro naka admit sa covid ward it Provincial Hospital.
Umabot eon sa 42 ro nailistang namatay bangud sa nasambit nga sakit.
Sa pihak nga parte, padayon suno kana sanda nga nagahueat it go signal halin sa manufacturer it covid vaccine nga AstraZeneca para sa andang gin bakae nga bakuna.
Gindugang pa ni mayor Lachica nga sa makaron hay sigidas ro andang vaccination roll out sa oras nga makabaton it alokasyon nga mga bakuna halin sa Department of Health.
Nag-request eon man sigon sanda kay president duterte ag sa iba pang natungdan nga ahensiya it gobyerno it dugang nga alokasyon it covid vaccine agud nga maprotektahan ro mga naga agi nga turista sa oras nga mabuksan eon ro kalibo international airport para sa mga naga-agto sa pamosong isla it Boracay.
Sa pihak nga parte, gindugang it alkalde nga balik eon man suno kana sa normal ro operasyon it tanan nga mga taeatapan it munisipyo it Kalibo nga nauna eon nga naapektuhan it mga nagpositibo nga pilang empleyado.
