KALIBO, Aklan—Nako-kontrol eon ro kaso it covid 19 sa banwa it Kalibo rason nga naghaeuga eon man ro mga quarantine facilities.
Raya ro ginkumpirma ni liga ng mga barangay president Kalibo chapter ag Pook punong barangay Ronald Marte.
Suno kana nga bukon eon it masyadong punuan ro mga quarantine facility nga sangka senyales nga kontrolado eon it lokal nga gobyerno ro pagkalhit it deadly virus.
Maabu eon man suno kana sa mga pasyente hay nagmayad eon.
Ro pagnaba suno kana it kaso sa Kalibo hay bangud sa ginpabaskog nga contact tracing nga kaparte it andang sistema nga prevent-detect-isolate-treat-reintegrate ukon PDITR.
Base sa ulihing datos it Aklan Epidemiology and Disease Surveillance Unit ko Agosto 22 hay nakalista eon lang ro Kalibo it 29 nga bag-ong kaso.
Ro kalibo hay may kabilugan nga 2,747 nga kaso it covid 19 umpisa nga nagtuhaw ro pandemya.
Sa nasambit nga numero, 2,429 ro nagmayad samtang ro aktibong kaso hay 215 ag 103 eon ro namatay.
Sa pihak nga parte, gintalakay man sa ginpatigayon nga session it sangguniang bayan ro angot sa monitong ag reporting it covid cases kamana man ro kakueangan it mga contact tracers.
Imbitado sa session ro Department of Health ag municipal health office.
