KALIBO, Aklan—Kontrolado eon ro pagkalhit it Coronavirus Disease 2019 ukon COVID-19 sa mga lugar nga nakalista it pagtaas it kaso sa banwa it Nabas.
Suno kay Nabas mayor James Solanoy nga pila sa mga sitio sa barangay Alimbo-baybay hay ginpaidaeum nanda sa surgical lockdown agud nga malimitahan ro aktibidad it mga tawo.
Kapin sa 210 sigon nga mga residente ro andang ginpaidaeum sa swab test ag siyam sa mga raya ro nagpositibo sa Coronavirus samtang ro iba hay ginahueat pa ro andang resulta ag presenteng naka quarantine ro mga raya.
Aminado man ro alkalde nga maabu nga gina-trangkaso sa lugar bangud sa daeagan it tiempo.
Ginapatihan nga pila sa mga pasyente hay nakaangkon it deadly virus matapos nga mag-agto sa lamay sa namatyan.
Sa pihak nga parte, gindugang pa ni Mayor Solanoy nga sigidas ro andang pagpatigayon it vaccination rollout sa andang banwa.
Natapos eon sigon ro kaabuan sa andang mga frontliners ukon naeakip sa A1 group rason nga magaderetso eon sanda sa pagbakuna sa andang mga senior citizens ukon A2 groups umpisa Sabado hasta Lunes.
Ginkalipay man nana ro mataas nga turn-out it andang inoculation.
