KALIBO, Aklan—Nadugangan eon man it daywang bag-ong kaso it coronavirus disease 2019 (COVID-19) ro Barangay Poblacion, Kalibo.
Sambilog kara hay residente it Purok 4 C. Laserna St. Kalibo ag ro sambilog pang kaso hay halin sa Concepcion St. Kalibo.
Ko nagtaliwan nga adlaw hay ap-at nga kaso ro nailista nga puro mga residente it Purok 4 C Laserna St. Kalibo ag magpamilya.
Ginpaidaeum sanda sa swab tests matapos matapnan kat makasalamuha ro sangka paryente nga nagpositibo sa sakit nga residente it Brgy. Old Buswang, Kalibo.
Suno kay punong barangay Neil Candelario it Brgy. Poblacion, Kalibo nga ginahueat pa nanda ro iba pang resulta halin sa molecular laboratory it Aklan provincial hospital it mga ginboe-an it swab specimen sample nga nakasalamuha it mga bag-ong nailistang covid positive ukon mga high risk contact.
Naka-quarantine facility eon sigon ro mga pasyente.
Gindugang pa ni kapitan candelario nga ginatutukan sigon nanda ro sitwasyun sa lugar bangud nga mag-eowas nga maabu ro tawo hay dukot-dukot pa ro mga baeay.
Indi sigon nanda gusto nga matabu it uman ro naexperiensiyahan it mga taga purok uno nga masobra sa daywang domingo nga ginpaidaeum sa lockdown .
Sa pihak kara, padayun nanda nga ginahueat ro desisyon ni Kalibo mayor Emerson Lachica angot kara.
Samtang, makabig suno kana nga fake news ro nagkalhit nga balita nga naka-agto sa banwa it madalag ro sambilog sa mga nagpositibo sa sakit.
Ro nasambit nga balita hay nauna eon nga ginpamalibaran it LGU-Madalag nga nagapabilin nga covid free sa bilog nga probinsiya it Aklan.
