KALIBO, Aklan—Haeos owa eon naila nga magguwa it anang condominium ro sangka Overseas Filipino Worker sa Indonesia bangud sa kahadlok sa nagatinaas nga kaso it covid 19 tuga it makataeapon ag makamaeatay nga Delta variant.
Aminado si Engr. Dwight Balmaceda, nagatrabaho sa capital city nga Jakarta nga nahadlok imaw nga matapnan it sakit bangud nga haeos punuan eon ro mga ospital idtu.
Suno kana nga pila sa anang mga katrabaho nga pinoy ag iba pang lahi hay nakaangkon eon it sakit ag sa baeay eon lang ginabueong bangud sa kakueangan it mga hospital beds.
Libu-libu suno kana kada adlaw ro kaso ag ro numero it mga nagakamatay butang nga naeampasan eon it Indonesia makaron ro india bilang epicenter it sakit sa bilog nga Asya.
Gindugang pa ni Engr. Balmaceda nga makaron eamang nagpatuman it lockdown ro Indonesia umpisa nga mag eupok ro pandemya bangud sa pagkabaeaka nga maapektuhan ro andang ekonomiya.
Ginpaeapad makaron ro restrictions sa bilog nga nasyon agud nga matapna eon ro transmission it Delta variant.
Eubus suno kana ro anang pagdahan maskin nga fully vaccinated eon , kun sa siin maskin ro andang kompaniya hay nagmandu kanda nga magpatigayon it work from home.
Samtang, nagapati man si engr Balmaceda nga posibleng nagtaas pa gid ro kaso bangud sa selebrasyon it Islamic holiday it Eid al-Fitr ko Mayo.
