KALIBO, Aklan — Ginlaygayan it Provincial Health Office (PHO)-Aklan ro publiko nga maging madahan angot sa maka-alarma nga pagtaas it kaso it dengue sa probinsiya makaron nga dag-on nga kon sa siin nag-abot eon sa 9 ro nailistang namatay.
Base sa datus it PHO, naga-abot eon sa 1,043 ro kaso it dengue umpisa Enero 1 hasta Hunyo 1 it makaron nga dag-on .
Mas mataas raya it 50 porsiyento kumpara sa kaparehong period ko 2018.
May pinakamataas nga kaso sa banwa it Kalibo nga may 300; ginsundan it Banga nga may 107 ag Numancia nga may una nga 94.
Tanan nga 17 nga banwa sa Aklan hay may kaso it makamaeatay nga sakit .
Ro may pinakamanaba nga kaso it dengue hay ro Madalag nga may una eamang nga 10.
Kaeabanan sa mga nagkasakit it dengue hay mga unga nga naga-edad it sang dag-on hasta 10 dag-on nga may 385 nga kaso ukon 37 porsiyento it kabilugan nga numero .
Agud nga makalikaw sa dengue, ginlaygay ni Dr. Victor Sta. Maria it PHO-Aklan nga sundon it publiko ro ‘4S’ campaign it DOH ukon ro search and destroy mosquito breeding places, secure self-protection, seek early consultation ag support fogging or spraying only in dengue hotspot areas.
Ginaeauman pa sigon ro pagtaas it kaso it dengue makaron nga Hunyo sa pagsueod it tiempo it tag-uean.
