KALIBO, Aklan — Bangud sa padayon nga pagbueoligan it mga pumueoyo ag mga natungdan nga ahensya, nagnaba ro kaso it dengue sa probinsya it Aklan pag-abot sa 38 mobility week.
Raya hay suno kay Roger Debuque, dengue coordinator it Provincial Health Office (PHO)-Aklan sa interview it Bombo Radyo.
Base sigon sa pinakaulihing datos it Provincial Epidemiology Surveillance and Response Unit (PESRU), nakalista ro ahensya it kabilugang 5,392 nga kaso halin ko Enero 1 hasta it Setyembre 21 nga mas mataas gihapon it 335 porsyento kon ikumpara sa kaparehong period ko nagtaliwan nga dag-on nga nakalista eamang it 1,239 nga kaso.
May kaangtanan kara, sa nasambit nga mobility week hay nakalista eamang it 78 kaso ro ahensya nga mas manaba it pilang pilo halin kat gindeklara ro outbreak sa bilog nga probinsya it Aklan.
Suno pa kay Debuque, nagapakita eamang raya nga naging epektibo ro ginhimo nga tikang it gobyerno sa pagpanguna it PHO partikular ro padayon nga information dissemination sa mga pumueoyo ag ro dueoeongan nga pagpatigayon it 4 o’clock habbit.
Sa pihak nga parte, padayon nga naga-iral ro outbreak sa bilog nga probinsya.
Nagapanguna gihapon sa listahan nga may pinakamaabong kaso hay ro banwa it Kalibo nga may 1,064 kaso; Banga nga may 477 kaso; New Washington nga may 476 kaso; Numancia nga may 403 kaso ag Balete nga may 370.
Sa nasambit nga kaso suno kana hay kapin sa 23 katawo eon ro nailistang namatay sa dengue.
Bangud kara, inde sigon dapat nga maging kampante ro mga pumueoyo ag padayunon ro paglimpyo sa andang palibot partikular ro pagsunod sa 4’S strategy.
