KALIBO, Aklan — Samtang nagapadayun pa ro kampanya it gobyerno kontra sa sakit nga dengue, nagnaba eon man ro numero it kaso kara sa probinsiya it Aklan .
Suno kay Dr. Vic Sta. Maria it Provincial Health Office ukon PHO-Aklan, mabahoe nga bulig ro pagbueuligan it kada sektor eabi eon ro mga lokal nga gobyerno sa probinsiya kun sa siin hay gintutukan ro pagpatigayon it mga preventive measures agud nga mabaeabagan ro pagtaas it kaso it dengue.
Dugang pa it opisyal, amat-amat eon nga nag-naba ro kaso it dengue umpisa ko buean it Setyembre ag Oktubre kumpara ko mga buean it Hunyo ag Hulyo.
Umpisa suno kana Enero 1 hasta Oktubre 5, ro kaso it dengue hay nailista sa 5,532 ukon 307 per cent nga pagtaas kumpara ko 2018.
Ro banwa it Kalibo ro nagapanguna sa may pinakamataas nga kaso nga nag-abot sa 1,084; ginsundan it Banga nga may 490, New Washington nga may 488, Numancia nga may 410 ag Balete nga may 377 .
Samtang , ro may pinakamanabang kaso hay ro banwa it Malinao nga nakalista eamang it 111.
Sumaka man sa 23 ro mga namatay sa Aklan bangud sa dengue.
Angot kara, maskin nga may pagnaba eon sa kaso it dengue sa probinsiya, ginpadumdum sa gihapon ni Dr. Sta. Maria ro tanan nga ipabilin nga malimpyo ro palibot ag padayunon ro mga mayad nga hilimuon nga naumpisahan it mga LGUs hasta sa mga barangay pinaagi sa 4S strategy.
