KALIBO, Aklan — Naga-abot eon sa 3,877 ro kaso it dengue sa probinsiya it Aklan umpisa Enero 1 hasta Agosto 3, 2019 .
Suno kay Dr. Cornelio Cuatchon it Provincial Health Office ukon PHO-Aklan nga raya hay base sa andang listahan.
Mas mataas raya it 294% kumpara sa kaparehong tiempo ko nagtaliwan nga dag-on .
Mag-eowas kara, nagtaas man ro numero it mga namatay bangud sa dengue ag mga kumplikasyon nga daea kara nga nag-abot eon sa 18.
Ro banwa it Kalibo sa gihapon ro may pinakamataas nga kaso nga nag-abot sa 816 , ginsundan it banwa it Banga nga may 396, New Washington nga may 344, Balete nga may 310 ag ro Numancia nga may 284 nga kaso .
Ginpahayag pa nga ro banwa it Balete ro may pinakamataas nga attack rate nga umabot sa 101.71% .
Gindugang pa ni Dr. Cuatchon nga ro Barangay Poblacion sa Kalibo ro may pinakamataas makaron it kaso it dengue sa bilog nga Western Visayas .
Angot kara, panawagan it PHO nga ugalion sa gihapon ro paglimpyo sa palibot, pag-usoy ag pagsamad sa mga lugar nga ginapamugaran it mga namok nga nagadaea it dengue, self protection, early consultation ag paglikaw sa indiscriminate fogging.
Ro pagtaas it kaso it dengue ro sambilog sa mga naging rason kon ham-an nga ginpaidaeum sa dengue outbreak ro bilog nga probinsiya ko nagtaliwan nga buean it Hulyo.
