KALIBO, Aklan — Nagtaas it 47 porsiyento ro numero it kaso it dengue sa probinsiya it Aklan makaron nga dag-on kumpara ko 2018.
Suno kay Provincial Health Officer Dr. Vic Sta. Maria nga nagtaas ro kaso it dengue it 317 makaron nga 2019 kumpara ko 2018.
Naga-abot sa 665 ro kaso it dengue umpisa Enero hasta Mayo 25 ko 2018 samtang 982 man ro nailista sa kaparehong period makaron nga dag-on .
Base sa record, siyam ro namatay bangud sa komplikasyon nga mas mataas man kumpara ko nagtaliwan nga dag-on sa kaparehong period nga nakalista it pito.
Ro mga banwa suno kay sta. maria nga may namatay bangud sa dengue hay ro banwa it Balete, Tangalan, Kalibo, Malay, New Washington ag Numancia.
Ginpadumdum ni Dr. Sta. Maria nga mas pang hugtan ro paglimpyo sa sueod ag guwa it panimaeay agud nga malikawan ro pag-abu it mga breeding site ukon lugar nga ginapangitlugan it mga namok nga nagadaea it dengue eabi eon makaron nga nagahilapit ro pagsueod it tiempo it tag-uean .
Sa makaron hay may ginapanupod man sigon nga larvicides para sa mga lugar nga may maabung kiti-kiti agud nga matapna ag indi eon mag-abu pa.
Ko buean it Pebrero nakalista it maabung kaso nga nag-abot sa 280.
