KALIBO, Aklan—Nakalista ro probinsiya it Aklan it 59 porsiyentong pagtaas it mga kaso it dengue sa unang pitong buean it 2024.
Suno kay Roger Debuque, health program officer II it Provincial Health Office ukon PHO-Aklan, may 989 nga kaso eon it dengue nga nailista sa probinsiya umpisa Enero hasta Hulyo 20 it makaron nga dag-on kumpara sa nailista ko 2023 sa kaparehong period nga may una nga 620.
Haeos tanan nga age group hay may mga kaso it dengue.
Kaabuan sa mga nailistang kaso hay mga inunga nga naga-edad it sang dag-on hasta napueong dag-on nga naga-abot sa 295.
May mga tinamaan man it dengue nga mga senior citizens nga 61 anyos pataas nga naga abot sa 78 cases.
Sambilog ro nailistang namatay bangud sa sakit nga naghalin sa banwa it Batan nga sangka senior citizen.
Samtang, ro banwa it Kalibo ro may pinakamaabu nga kaso it dengue nga may 162; ginsundan it Malay nga may 152 ag nagapangatlo ro Ibajay nga may 81.
Kaibahan man ro Nabas nga may 80; Numancia 67; New Washington 62; Batan ag Tangalan nga may tig-50; Libacao 47; Makato ag Buruangan nga may tig-41 cases ; Lezo 34; Banga ag Malinao nga may tig-32 cases; Balete 21; Madalag 19; ag Altavas 18 nga nagapakita eamang nga tanan nga banwa sa Aklan hay may nailistang kaso.
Bangud kara, nagpanawagan si Debuque sa mga pumueuyu nga insigidang magpa-checkup sa pinakamaeapit nga health center ukon ospital ro mga unga nga gina-eagnat it sang adlaw hasta daywang adlaw ag iba pang sintomas agud nga mapaidaeum sa test.
Gin abisuhan man nana ro publiko nga padayun nga maging madahan sa dengue pinaagi sa paglimpyo it baeay ag pagbo-oe sa mga posibleng gina-istaran it namok.
Uman kara nga ginpadumdum nga ipatuman ro “5 S strategy” bilang pangsukoe sa dengue nga ginaeakipan it Search and destroy mosquito breeding sites,Self-protection like using of insect repellents, Seek early consultation at the nearest health care facility, Support fogging, spraying, and misting in hotspot areas ag Sustain hydration.
