Kapin sa 21% ro ginnaba it kaso it dengue sa bilog nga probinsya it Aklan nga nailista halin ko buean it Enero hasta ko Hunyo 14 it presenteng dag-on kon ikumpara sa nagtaliwan nga dag-on.
Raya hay matapos nga nakalista eamang it 472 nga kaso makaron nga period kon ikumpara ko nagtaliwan nga dag-on nga umabot sa 595 cases.
Suno kay Roger Debuque, Health Program Officer II ag Dengue Program Coordinator it Aklan Provincial Health Office, nagapanguna gihapon sa listahan it may mataas nga kaso it tinamaan it dengue ro banwa it Ibajay nga nakalista it 129 nga kaso; ginasundan it munisipalidad it Malay nga may 74 cases; banwa it Nabas nga may nga 50 nga kaso ag munisipalidad it Kalibo nga may 48 cases.
Sa makaron suno kana nga nagsueod eon ro panyempo naton sa rainy season, padayon ro andang kampanya kontra dengue eabi eon ag nagbukas eon ro klase para sa school year 2025-2026 kon sa siin uwa it ginapili nga edad ro maangkit it eamok nga nagadaea it virus nga dengue.
Bangud kara, hugot ro andang padumdom sa publiko nga magpanglimpyo sa palibot agud nga inde pagtiniran it eamok ag ipractice gid ro 5’S strategy nga ginakaeakipan it 𝙎𝙚𝙖𝙧𝙘𝙝 𝙖𝙣𝙙 𝘿𝙚𝙨𝙩𝙧𝙤𝙮 𝙈𝙤𝙨𝙦𝙪𝙞𝙩𝙤 𝘽𝙧𝙚𝙚𝙙𝙞𝙣𝙜 𝙎𝙞𝙩𝙚𝙨, usuyon ro mga posibleng pangitlogan it eamok ag samaron; 𝙎𝙚𝙘𝙪𝙧𝙚 𝙎𝙚𝙡𝙛 𝙋𝙧𝙤𝙩𝙚𝙘𝙩𝙞𝙤𝙣, maggamit it mahaba nga eambong ukon magsuksok it pajama kamana man maggamit it mga mosquito repellant lotions; 𝙎𝙚𝙚𝙠 𝙀𝙖𝙧𝙡𝙮 𝘾𝙤𝙣𝙨𝙪𝙡𝙩𝙖𝙩𝙞𝙤𝙣, kon may sintomas kaparehas it eagnat, ubo ag iba pa hay magpakonsulta eagi, 𝙎𝙪𝙥𝙥𝙤𝙧𝙩 𝙁𝙤𝙜𝙜𝙞𝙣𝙜 𝙖𝙣𝙙 𝙎𝙥𝙧𝙖𝙮𝙞𝙣𝙜 𝙞𝙣 𝙝𝙤𝙩𝙨𝙥𝙤𝙩 𝙖𝙧𝙚𝙖𝙨 sa mga lugar nga mataas ro kaso it dengue; ag 𝙎𝙪𝙨𝙩𝙖𝙞𝙣 𝙃𝙮𝙙𝙧𝙖𝙩𝙞𝙤𝙣 kaparehas it pag-inom it maabong tubi para mahydrate ro eawas.
