Kabilugan nga 112 ro nailistang kaso it dengue sa bilog nga probinsya it Aklan base sa datos it Aklan Provincial Health Office maghalin ko Enero 1 hasta it Pebrero 18, 2023.
Raya hay may 2,140% nga pagtaas kon ikumpara sa kaparehong period ko nagtaliwan nga dag-on.
Ginpaathag ni Jake Flaviano, disease surveillance officer it PHO Aklan nga ro nakikita nandang factor sa pagtaas it nasambit nga kaso hay ro sigidas nga pag-inuean partikular ko buean it Disyembre hasta it Enero kon sa siin nakaangkon it breeding sites ro eamok nga Aedes Aegypti nga nagadaea it sakit nga dengue.
Sa nasambit nga numero, ro banwa nga may pinakamataas nga kaso hay ro Ibajay nga may 32; ginsundan it Nabas nga may 16, Kalibo nga may 14 ag New Washington nga may 11 nga kaso.
Samtang, ginklaro ni Flaviano nga ro andang taeatapan hay nagahimo eon it tikang eabi eon ro mga natungdan nga LGU’s agud nga inde eon madugangan ro kaso it dengue sa mga kabanwahan.
Angot kara, panugyan ni Flaviano sa mga pumueoyo nga sundon ro 4’s strategies agud malikawan ro pag-abo it eamok ag uwa eon it mabiktima pa it dengue.
Raya hay ginakaeakipan it Search and destroy mosquito breeding sites ukon usuyon ag himuson ro mga pwede pangitlugan it eamok; Self-protective measures ukon maggamit it mga insect repellant nga makaprotekta sa panit kontra sa eamok kamana man magsuksok it mga may mahaba nga butkon it eambong; Seek early consultations ukon magpakonsulta insigida sa doktor kon may nabatyagan nga sintomas it dengue sa eawas eabi eon kon may eagnat nga kapin sa daywa hasta tatlong adlaw ag Support fogging ukon suportahan ro pagpatigayon it fogging sa mga lugar nga may maabong kaso it dengue.
