KALIBO, Aklan—Nagaabot eon sa kabilugan nga 2,837 ro nailistang kaso it dengue sa bilog nga Western Visayas.
Sa nasambit nga numero, ro Iloilo Province hay may 63 nga bag-ong kaso, ginasundan it Bacolod City nga may 34 ag Negros Occidental Province nga may 24 nga bag-ong dengue cases.
Angot kara, ro probinsya it Aklan hay may una nga 467 nga nailistang kaso halin ko Enero 1 hasta Mayo 11 it presenteng dag-on.
Base sa Department of Health Western Visayas, nakitaan it pagtaas it kaso sa Aklan maghalin buean it Enero hasta makaron nga Mayo kon ikumpara sa kaparehong period ko nagtaliwan nga dag-on 2023.
Bangud kara, nagpanugyan ro natungdan nga ahensya nga ipabilin ro kalimpyuhan sa palibot it panimaeay kon sa siin umpisahan eon ro paglimpyo sa mga kanae ag sa mga lugar nga pwedeng pangitlugan it eamok nga may daeang dengue eabi eon makaron nga ginaeauman ro pag-uean-uean sa mga masunod nga inadlaw ukon binuean.
