KALIBO, Aklan—Kapin sa 229 ro nailistang kaso it Human Immunodeficiency Virus ukon HIV sa probinsya it Aklan.
Raya hay suno kay J-Lorenz Dionesio, Nurse III it Provincial Health Office (PHO)-Aklan sa interview it Bombo Radyo Kalibo.
Ro nasambitang datos suno kana hay nailista halin ko dag-on 1984 hasta it June 2019 base eon man sa surveilance data it Department of Health (DOH).
May kaangtanan kara, ro banwa it Kalibo, Malay, Ibajay, Banga ag Nabas ro may pinakamataas nga nailistang kaso it HIV sa probinsya bangud sa unprotected sex, multiple sex partners ag maabong iba pa.
Ro provincial hospital, PHO ag Malay hospital eamang ro may HIV testing facility sa Aklan rason nga ginakinahang-ean pa nanda nga ipadaea sa DOH ro resulta it mga medical examination it sangka pasyente ag mismong ro ahensya ro nagakumpirma kon positibo raya sa HIV.
Sa makaron suno kana hay nagatutok sanda sa community based seminar sa mga volunteers nga ginpadaea it lokal nga gobyerno halin sa banwa it Balete, Banga, Ibajay, Lezo, Libacao, Nabas, Numancia, Tangalan, New Washington, Batan, Kalibo ag Malinao nga sanda ro nagpaidaeom sa training para makapatigayon it free screening ukon HIV testing sa andang natungdan nga banwa.
