KALIBO, Aklan — Aminado ro Aklan Police Provincial Office ukon APPO nga maka-alarma ro record it kaso it Violence Against Women and their Children ukon VAWC partikular ro kaso it rape sa probinsiya it Aklan.
Nasayuran nga ko nagtaliwan nga mga domingo hay napabalita ro tatlong mabahoe nga kaso it pagpanghimueos nga natabu sa nagkaeain-eain nga parte it probinsiya .
Ko Hulyo 11, sangka 16-anyos nga dalagita ro gin-rape it anang 26-anyos nga tiyo sa Brgy. Pampango, Libacao, nga kon sa siin bangud sa pagka-konsensiya hay naghana nga magpakamatay ro suspek pinaagi sa pagbigti, paglaslas it pulso ag pag-inom it pesticide.
Pagka-aga it Hulyo 12, sangka pitong dag-on man nga unga ro gin-abusuhan sekswal it andang kabarangay samtang nga nagahampang sa suba sa Brgy. Lilo-an, Malinao nga naging rason it pagka-ospital it unga bangud nga gindugo.
Idugang pa kara ro pagpang-abuso it sangka ama-amahan sa anang 8-dag-on nga manak sa banwa it Makato.
Raya hay pila eamang sa mga kaso it rape nga napabalita mag-eowas pa sa insidente it pagpang-abuso sa mga kababayin-an sa nagtaliwan nga mga dinag-on.
Samtang, ro banwa it Kalibo ag Malay ro nagapangunang mga banwa nga may mataas nga kaso it pag-eabag sa kinamatarung it mga kababayin-an.
Sa pihak nga parte, ginpahayag ni P/Corporal Jane Vega, tagapaghambae it APPO nga pila sa mga ginaturo nga rason it pag-abu it rape cases ro waea-tuo nga advertisement it mga sex enhancer, kamana man ro iligal nga droga, aeak ag pagbinatasan it sangka indibidwal.
Bangud sa mga nagakatabu nga pagpang-abuso sekswal sa mga menor de edad, umapela sa publiko ro APPO nga bantayan ro mga unga kontra sa mga pagpang-abuso.
Kaabuan sigon sa mga biktima it rape hay kakilaea ukon kapamilya ro suspek.
Agud nga mas pang mapabaskog ro proteksyon, ginlaygay ni P/Corporal Vega sa mga ginikanan nga maging mapagbantay, magpasilabot, ag magsugid aeang-aeang sa kamaeayran it mga unga.
Mag-eowas kara, dapat man sigon nga maging mas responsabli sa pagpabahoe it mga unga sa tunga it naga-moderno nga paniempo.
