KALIBO, Aklan—Ginbasura it piskalya sa San Jose, Romblon ro ginpasaka nga kaso kontra kay Patrick Cahilig, ro ginaturo nga suspek sa brutal nga pagpatay sa mag-ina sa bahin it Hambil, Romblon ko buean it Enero.
Suno kay Jonah Cahilig, eubus ro andang kalipay matapos nga malimpyuhan ro pangaean it anang magueang.
Sambilog sigon raya sa pamatuod nga inosenti ag owa it kahilabtanan si Patrick sa natabo nga pag-masaker kanday Welyn Mendoza Tabuna, 29 anyos, single parent ag daywang unga nga eaeaki nga sanday TJ Tabuna, alyas Boy, 9 anyos ag JB Tabuna, alyas Jun, pitong dag-on, puro mga residente it nasambit nga lugar.
Madumduman nga nasapwan eon lang nga owa it kabuhi ag nagapaligos sa kaugalingon nga dugo ro mga biktima sa sueod it andang panimaeay matapos nga mag-angkon it mga grabeng tama it pagbuno ag eabo sa nagkaeain-eain nga parte it eawas.
Bangud sa kakueangan it bastante nga ebidensya, rason nga ginpahilway si Patrick.
Nagaeaum man ro pamilya Cahilig nga matapos eon ro diskriminasyon sa andang pamilya kasunod it pagbasura sa kaso.
