Ginhimay ni Atty. Janmar Barrios, Attorney-At-Law it Barrios Law Firm ro kaso nga Robbery with Homicide nga ginpasaka kontra sa gwardya nga si Mark Archie Torrefiel, 31-anyos it Brgy. Cajilo, Makato nga imaw man ro responsable sa brutal nga kamatayon ni Bonna Hercia Ambay, 23-anyos it Brgy. Nauring, Pandan, Antique ag sangka manager-reliever it RD Pawnshop Mabini St. Kalibo branch.
Ginpaathag ni Atty. Barrios nga sandig sa Revise Penal Code Article 294, sambilog eamang ro titueo it kaso apang daywa ro nakomitar nga krimen.
Suno kana, pagpanakaw eamang ro intensyon it akusado apang nakapatay raya it tawo rason nga nahueog sa nasambit nga kaso.
Ro sentensya sigon kara hay ro Reclusion Perpetua ag posibleng makulong ro akusado it 20 hasta 40 anyos.
Nakadepende sigon raya sa bug-at it mga ebidensya nga igapresentar sa korte sa oras nga pamatian ro anang kaso.
Madumduman nga igaduso it pamilya Ambay ro mintras nagakabuhi nga sentensya kontra kay Torrefiel agud nga eubusan nga maangkon ro hustisya sa hinali nga kamatayon it Antiqueña nga empleyada.
Si Torrefiel hay nakataeana nga iga-remit makaron nga adlaw sa Bureau of Jail Management and Penology ukon BJMP sa Brgy. Nalook, Kalibo kon siin imaw igakulong sa krimen nga nakomitar ko Hunyo 5 it presenteng dag-on.
