KALIBO, Aklan— Bangud sa paglobo it kaso it tigdas sa probinsya it Aklan, nagpatigayon it emergency orientation ro Provincial Health Office (PHO) sa tanan nga mga municipal health offices, mga government ag private hospital para matapna ro pagkalhit it makamaeatay nga virus.
Sa interview it Bombo Radyo Kalibo kay Provincial Health Officer II Dr. Cornelio Cuatchon, ginpahayag kara nga kapin sa 22 measles cases ro nailista it Epidemiology Surveillance & Response Unit (APESRU) halin ko Enero hasta ko Pebrero 14 it presenteng dag-on.
Ginpahayag dugang nga mas mataas raya it haeos 50% kon ikumpara sa kaparehong period ko nagtaliwan nga dag-on nga nakalista eamang it limang kaso.
Dugang pa it opisyal, uwa sigon nanda naabot ro 95% nga target kunta nga mass vaccination kontra sa nasambitang sakit.
Aminado man raya nga bangud sa Dengvaxia issue hay nahadlok ro mga ginikanan nga mabakunahan ro andang mga onga.
Apang, ginpasiguo it opisyal nga eowas ag epektibo ro nasambitang bakuna nga masobra sa 50 anyos eon nga ginagamit it Department of Health (DOH).
