Kalibo Aklan ———Mag-eowas sa kasong kriminal , posibleng magapangatubang pa sa kasong administratibo ro sangka pulis nga nakipag-relasyon sa sangka public school teacher nga may asawa eon nga nagatrabaho abroad .
Suno kay Sangguniang Panlalawigan Member Atty. Harry Sucgang nga raya hay bangud nga parehong nagatrabaho sa gobyerno ro daywa .
Mabahoe man suno kana ro posibilidad nga pareho sanda nga mapahalin sa trabaho ag mapresu .
Ginpaathag ni Atty. Sucgang nga ro adultery hay pwedeng ikaso sa sangka babaye nga kasado eon apang nakipagrelasyon pa sa ibang eaeaki mag-eowas anang asawa.
Ro pag-angkon suno kana it sexual intercourse it sangka babayeng kasado eon sa ibang eaeaki hay makabig nga adultery.
Ro penalidad sa mga babayeng mapamatud-an nga nagkasaea sa laye hay prison correccional ukon 6 months hasta 6 years nga pagkakulong depende sa counts it nasambit nga krimen.
Mabug-at sigon nga ebidensya ro litrato ukon video kun sa siin makita nga ro eaeaki ag ro anang kabit hay naga-istar sa sangka baeay eabi eon kon may testigo nga magapamatuod kara .
Ro penalidad sa eaeaki hay prison correccional ukon 6 months hasta 6 nga dag-on nga pagkakulong.
Gindugang pa ni Atty. Sucgang nga bangud nga ginakabig raya nga private crime rason nga ro pwede eamang nga magpasaka it kaso hay ro legal nga asawa.
Indi pwedeng ro kabit eamang ro kasuhan kundi nga dapat pati asawa .
Samtang, ginlaygayan man ni Atty. Sucgang ro mga misis eabi eon ro mga nagatrabaho sa abroad nga pirmeng isipon ro andang grabeng sakripisyo agud nga malikawan ro tentasyon .
Kamana man nga maging prayerful agud nga indi makahimo it saea sa kabuhi.
