KALIBO, Aklan—Sang buean antes ro ginakaeangkagan nga Kalibo Sto. Niño Ati-Atihan Festival, nagresign ro chairman it festival organizer nga Kalibo Sr. Sto. Niño Ati-atihan Management Council, Inc. ukon Kassamaco.
Ginkumpirma ni Kalibo Mayor Emerson Lachica nga may nabaton imaw nga kopya it resignation letter ni Apolonio Zaraspe III bilang chairman it Kassamaco.
Suno kay Mayor Lachica nga nakabaehag sa resignation letter ni Zaraspe nga “effective immediately” ro anang pagpanaog sa pwesto.
Apang, nagaeaum pa sigon ro Kassamaco board nga iga-reconsider ukon pagabawi-on ni Zaraspe ro anang desisyon.
Ginpasiguro man it alkalde nga maskin anu pa ro matabu “the show must go on” sa nagahilapit nga festival.
Sa makaron ro nagatindog nga OIC it event organizer hay si Mrs. Cecille Malapad-Calizo.
Madumduman nga mag-eowas sa gina-reklamo nga atrasado nga pag-release it financial aid para sa mga nagapasakop nga tribu ag grupo sa Kalibo Ati-Atihan Sadsad contest hay naging sakit man nanda it ueo ro pagsuspinde sa pag-apruba it sangguniang bayan sa Civil Society Organization ukon CSO accreditation it Kassamaco bangud sa gina-alegar nga kueang ag mga saea nga ginsumite nga bag-o ag dugang nga mga requirements.
Ro Kassamaco ro nagbueos sa dating festival organizer nga Kalibo Sto. Niño Ati-Atihan Foundation, Inc. ukon Kasafi sa pagdumaea sa Ati-Atihan festival 2020 pinaagi sa gahum it Executive Order No. 22 nga ginpaguwa ni Mayor Lachica ko Hulyo 10, 2019.
Sa makaron hay gina-ayos eon sigon nanda ro Memorandum of Agreement ukon MOA nga igasumite sa SB para sa pag-obra it sangka resolusyon.
