KALIBO, Aklan—Haeos daywang buean ro nabilin, ginpahayag it bag-ong organizers it Ati-Atihan nga KASSAMACO, Inc. nga 70 hasta 80% eon sanda nga tapos sa andang preparasyon para sa nagahilapit nga kapiestahan ni Sr. Sto. Niño de Kalibo.
Ro Ati-Atihan festival 2020 hay magabuhay makaron it napueong adlaw nga maga-umpisa sa Enero 10 hasta it 19, 2020.
Suno kay Mr. Apol zaraspe, chairman it Kassamaco nga sigidas ro andang preparasyon para sa festival ag gina-finalize eon ro mga aktibidad pinaagi sa bulig it mga stakeholders, kapulisan ag iba pang ahensiya it gobyerno para sa madinaeag-on, mabahoe ag malinong nga selebrasyon it Ati-atihan festival.
Ginpahayag pa nga pila sa andang mga ginatutukan nga aktibidad hay ro Mutya it Kalibo Ati-atihan Festival ag ro mga kasadyahan sa Magsaysay Park.
