Padayun ro pagpangasubo sa Ateneo de Zamboanga University (AdZU) sang domingo matapos ro makamaeatay nga pagpamaril sa Tumaga campus ko Agosto 18 nga ginkamatay it dalawang high school student, kaibahan ro suspek nga nagpakamatay matapos ro insidente.
“A week has passed, but grief does not follow a timetable. Some may be ready to return to familiar routines; others will need more time, more support. So let us continue to be patient with one another, especially gentle with those who are carrying the deepest grief,” ginpaguwa nga pahayag ni AdZU president Fr. Guillrey Anthony Andal ko Lunes.
Nagpatigayon ro unibersidad it nagkaeain-eain nga accompaniment activities, kaibahan ro candle-lighting ag prayer service. Ginpasugtan man ro mga junior high school student nga boe-on ro andang mga gamit sa Tumaga campus.
Nagpatigayon man it Kumustahan Session para sa faculty ag staff, samtang nakataeana man nga magpatigayon it kapareho nga mga aktibidad para sa mga college student.
Ginpamilit ni Andal nga owa it lugar ro kinagamo sa sosyudad ag kinahangean ro pagbueuligan it pamilya, eskwelahan, gobyerno, mga institusyong pangrelihiyon, media ag bilog nga komunidad agud nga malikawan ro mga makarondaya nga insidente.
Nagpanawagan man ro AdZU sa publiko ag media nga maging madahan sa pag-share it mga litrato, video ag impormasyon angot sa pagpamaril. Suno sa unibersidad, pwedeng makadugang pa it sakit sa mga pamilya ro saea nga impormasyon ag pagpakalhit it mga materyales, kaibahan ro AI-generated content nga may kaangtanan sa mga menor de edad.
Samtang ginahueat pa ro pinal nga police report, padayun ro pakikipagbueuligan it AdZU sa mga awtoridad ag pagpatibay it seguridad sa campus.
Kaibahan sa mga tikang ro pagbo-oe it dugang nga walk-through metal detector ag X-ray machine, pagpamayad it perimeter security ag CCTV coverage, ag pagpabaskog it live monitoring ag psychological support para sa mga estudyante ag pamilyang naapektuhan.
