KALIBO,Aklan–Matawhay ag malinong eon makaron ro bilog nga Moscow rong kabisera it nasyong Russia.
Raya hay kasunod it natabo nga krisis sa nasambit nga nasyon kun sa siin involved ro Wagner paramilitary group.
Suno kay Bombo International Correspondent Paulo Prado it Russia nga balik eon sa normal makaron ro palibot sa nasambit nga lugar ag owa eon sigon it makit-ang mga suldado nga nagalibot mag-eowas eamang sigon sa mga suldado nga nagabantay sa boarder control.
Ginklaro dugang kara nga bukon it rebeldeng grupo ro wagner apang sangka private military group nga ginmanduan nga makigsukoe man sa Ukraine.
Angot kara, nag-atake ro Russia sa Ukraine apang ko nagtaliwan eamang nga weekend, baliskad ro hitabo bangud kinahangean protektahan it Russia ro kabisera nga Moscow maghalin mismo sa alima it mercenaries nga kahimuan mismo ni Putin.
Ro tumaeagsahon sigon sa sitwasyon hay bangud internal raya nga isyu kun sa siin may nagkwestyon sa otoridad ni Putin maghalin mismo sa sueod nga kaalyado sa Russia.
Ginpahayag dugang nga nakaangkon it intensidad it krisis sa Russia matapos nga ro lider it Wagner Group nga si Yevegeny Prigozhin hay nagmandu sa anang mga suldado nga magsukob sa Moscow ag nagkontrol sa Russian military facilities samtang paagto sa kabisera it nasyon.
Byernes kat gin-akusahan ni Prigozhin ro militar it Russia nga nag-atake sa Wagner camp ag nagpatay sa anang mga tinawo.
Nagbaeos man ro Kremlin sa pwersa nga ginpakita it Wagner Group paagi sa pag-deploy it armado nga tropa sa mga daeanon sa Moscow kadungan it paandam sa mga residente nga magpabilin anay sa andang mga paniameay.
Sa pihak nga parte, nakaangkon eon suno kay Prado it kasugtanan sa tunga it daywang grupo nga tapuson eon ro nasmabit nga kinagao ko adlaw it Sabado.
Samtang nagdiretso man si Prigozhin sa kaiping nga nasyong Belarus ag owa eon nagpadayon sa pagsukob ro Wagner fighters.
