KALIBO, Aklan—Kasunod it pagbaskog it Northeast Monsoon sa bahin it Caticlan, Malay hay ro pagpaguwa man it sea travel ag sea sport advisory it Philippine Coast Guard Aklan.
Ginpahayag ni Senior Chief Petty Officer Dominador Salvino, Deputy Station Commander for Operation it PCG Aklan nga umpisa kahapon alas-2:00 sa hapon, temporaryo anay nga ginhalin sa Cagban Port ro mga motorbanca nga maghalin sa Caticlan Jetty Port nga may biyaheng Tabon port paagto it Tambisaan port ag vice-versa.
Kamana man sa tanan nga sea sport activity sa bahin it Bolabog area ukon back beach nga kung siin temporaryo anay nga ginhalin sa may bahin it front beach umpisa kahapon, alas-12:00 it tru-adlaw.
Samtang, sa makaron owa pa it nakataeana nga schedule kung hasta hin-uno ro nasambit nga mga pahisayod.
Samtang,padayon man ro pagmonitor it PCG-Aklan angot sa daeagan it panyempo ag kondisyon it baybayon.
Sa pihak nga parte, ginpasiguro man ni Salvino nga haum ro taeatapan it PCG-Aklan nga bantayan ro seguridad it mga turista ag pumueoyo sa Isla it Boracay.
