Nagpatigayon it clean up drive sa isla it Boracay ro grupo ni Jeus Ray Padilla, project coordinator it smoke free Aklan kasunod it selebrasyon it “World No Tobacco Day” ko Mayo 31, 2022.
Suno kana, maka-alarma ro pagkalhit it upos it sigarilyo sa bibi it baybayon kon siin ro iba kara hay nakaeobong eon sa maputi nga baeas it isla.
Kaibahan ro regional tobacco control network ag iba pang partners it natungdan nga organisasyon hay tuyo nanda nga mapadayon ro nasambit nga adbokasiya.
Sa 17 ka munisipalidad sigon hay sangka banwa eon lang ro andang ginaengganyo nga maging komprehensibo ag pasanyugon pa gid ro andang ordinansa angot sa pagbawae sa pagpanigarilyo.
Nauna eon nga ginlunsar it Department of Health ro kampanyang “smoke-free beaches, parks and tourist destinations.
Kaibahan sa mga “pilot areas” para sa smoke-free beaches campaign ro isla it Boracay sa pakikipagbueoligan sa smoke free Aklan.
