Nagapadayon ro monitoring it pulisya agud nga matumod kon sa siin ag sin-o ro ginhalinan it nagakalhit nga pekeng kwarta sa Kalibo public market.
Suno kay PLt. Manuel Estrada, deputy chief of police for administration it Kalibo PNP Station nga maid-id ro andang pagpangusisa ag pagbantay makaron agud nga inde eon madugangan ro mga nabiktima it makarundaya nga modus.
Panugyan nana sa mga negosyante ag vendors nga maging mausisa sa andang mga ginabaton nga kwarta maghalin sa bumaeakae eabi eon kon mabahoe raya nga kantidad.
Madumduman nga maabo ro nagreklamo nga vendors matapos nga nabiktima it peke nga kwarta nga nagabalor it 500 ag 1000 bills.
Mag-eowas kara, sigidas man ro andang monitoring sa mga illegal gambling sa banwa it Kalibo kon sa siin ro iba kara hay naipaidaeom eon sa andang operasyon ag ginausisa pa nanda ro iba pang kasabwat it andang mga naaresto.
