Nagapadayon makaron ro ginapatigayon nga clearing operations it mga natungdan nga ahensya sa banwa it Nabas kasunod it nag-eontad nga landslide kahapon it agahon sa may bahin it Sitio Pooc, Gibon, Nabas.
Raya hay mismong nagtuhaw sa project site it DPWH nga safety net installation para matapna kungta ro landslide sa nasambit nga lugar.
Ginpahayag ni Reynard Dela Cruz it MDRRMO Nabas nga sa bulig man it LGU-Nabas ag contractor sa nasambit nga proyekto hay nagapadayon sa makaron ro andang paglimpyo sa nasambit nga karsada.
Bangud sigon sa sigidas nga pag-inuean ag sa posibleng nagapadayon nga operasyon it DPWH ro ginatan-aw nanda nga gintunaan it eubusan nga paghugos it eogta.
Insigida man sigon nga nagpadaea it equipments ro LGU-Nabas sa area kamana man ro DPWH Aklan para magpatigayon it clearing operation.
Sa bulig suno kay Dela Cruz it mga nagkaeain-eain nga ahensya it Nabas mangin ro mga pumueuyo it lugar hay passable eon sa makaron ro katunga nga parte it nasambit nga national highway.
Puspusan man ro pagsaayos it contractor sa pihak nga linya para daeayon eon nga makaagi sa magtimbang nga parte it karsada ro tanan nga klase it saeakyan.
Nag-apela man raya sa mga pumueuyo eabi eon gid sa mga biyahero nga makaangkon it mahabang pasensya bangud sa magatuga raya it delays ag traffic.
Sa mayad nga swerte, owa it nailista nga nakaangkon it kasamaran ukon naaksidente angot sa nasambitan nga insidente.