KALIBO, Aklan — Pormal nga gin-umpisahan ro kauna-unahan nga Aklan Paralympic Games 2019 kahapon it agahon sa Calangcang Sports Complex nga ginaeakipan it masobra sa 100 nga mga atleta halin sa waeo nga nagkaeain-eain nga mga eskwelahan sa probinsiya.
Raya hay kadungan sa 41st National Disability Prevention and Rehabilitation Week.
Pila sa mga nagpasakop hay ro Malay Elementary School, Altavas Elementary School, Banga Elementary School, Buruanga Elementary School, Ibajay Central School, Kalibo Integrated Special Eduction Center ukon KISEC , Kalibo Pilot Elementary School ag Numancia Elementary school.
Raya hay sa pakikipagbueuligan man it provincial government, Provincial Social Welfare and Development Office ag Persons with Disabilities Affairs.
Suno kay Randy Rebaldo , head it PWDs sa Aklan ag sports coordinator it event nga tuyo kara nga makakita ag makahanas pa it ibang mga atleta nga may potensyal sa nagkaeain-eain nga sporting event.
Suno kana nga indi malikawan nga ro ibang mga Paralympic players nga gold medalist it hay pagaboe-on nga national player rason nga bilang preparasyon hay gintukod nanda ro 1st Paralympic Games sa Aklan.
Kaeabanan sigon sa mga sports kara hay ro mga ginahampang it PWDs sa Palarong Pambansa.
Samtang, gina-engganyo man nana ro mga PWDs nga magdangop sa andang taeatapan agud nga makaangkon it mga benepisyo ag matun-an ro mga ginikanan nga indi ikahuya ro andang mga unga nga may kapansanan.
Ginaduso man sigon nanda nga ro letrang D sa PWD hay bayluhan it dream, determination ag dignity imbes nga disability.
