KALIBO, Aklan—Naka-quarantine eon makaron sa Ligtas Covid Center (LCC) nga ginprovide it lokal nga gobyerno it Kalibo ro kauna-unang Locally Stranded Individual (LSI) nga nagpositibo sa Covid-19.
Suno kay Punong Brgy. Neil Candelario it Brgy. Poblacion, Kalibo nga base sa andang imbestigasyon hay nagsunod sa quarantine ag health protocols ro 23-anyos nga estudyante halin sa Cebu.
Ginpaathag nga daywa sandang taga-Kalibo nga nakauli halin sa Cebu kon sa siin sanda na-stranded ag uwa ro mga raya nagdiretso sa andang tagsa ka panimaeay kundi nagrenta it boarding house ag idto sanda nagpabilin it 14 diyas para sa quarantine period.
Ro kaibahan sigon kara nga LSI hay negatibo sa Covid-19 ro confirmatory result nga nagguwa.
Nasayuran nga sa ginpaguwang official statement it Provincial Health Office (PHO) Aklan nga ro nasambit nga LSI hay nag-abot sa banwa it Kalibo ko June 11 kon sa siin matapos nga ginprofiling hay insigidang ginpaidaeom sa strict home quarantine.
Ko June 22 hay ginboe-an imaw it specimen sample ag ginpadae asa Western Visayas Medical Center, Department of Pathology, Sub-National Laboratory for confirmatory testing.
Apang, kahapon eamang nagguwa ro resulta it anang swab test kon sa siin nakabaehag nga positibo imaw sa virus nga Sars-Cov-2 nga nagadaea it sakit nga Covid-19.
