KALIBO, Aklan — Kawad-an it bastante nga espasyo para sa parking area ro nakikitang nagapangunang rason it paggutok it karsada sa relocation site it Kalibo Public Market sa eastern side terminal sa San Lorenzo Drive sa Barangay Andagao, Kalibo.
Suno kay market master Noe Pador nga raya ro nagapanguna nanda nga problema makaron sa nasambit nga lugar.
Maabu suno kana ro road obstruction bangud sa kawad-an it parking space bangud sa mapiot ro lugar.
Dugang pa it opisyal, maskin nga ginatinguhaan nanda nga maayos ro nasambit nga problema ag maging haeuga ro mga daean pasueod it relocation site hay owa man sigon sanda it mahimo bangud nga owa gid sanda it espasyong magamit para sa parking.
Sa kamatuoran suno kana hay haeos 24 oras eon nga nagatrabaho ro mga traffic officers eabi eon kon may mga truck nga naga-deliver.
Sa pihak kara, padayun nanda nga gina-usuyan it solusyon ro problema agud nga makatau it kasoehayan sa parehong bumaeakae ag mga negosyante .
Sa pihak nga parte, sigidas sigon ro construction it new public market nga naga-angkon it mga manami nga facilities nga may initial nga pondo pinaagi sa government loan nga P300-million .
Ginaeauman nga matapos raya sa sueod it sang dag-on.
